Første helga i februar (laurdag 1.- søndag 2.) er det duka for den legendariske lysbildesamlinga på Standalhytta! Det er 50 overnattingsplassar på hytta, og du tingar automatisk overnatting ved å melde deg på. Kjempemotivert kjøkkengjeng er mobilisert og klar for å servere dei lekraste rettar!
Har du bilete som du vil vise fram? Send ein epost til drift@sunnmorsk-klatreklubb.no der du skriv 2-3 stikkord om kva du vil vise bilete frå, kva slags teknologi du nyttar og kor lang tid du treng (20 min er optimalt).
Alle påmeldte vil få tildelt ei dugnadsoppgåve relatert til oppvask eller nedvask.
Samlinga er eit medlemsarrangement for medlemmer i SKK over 18 år.
Prisen er flat. Det vil seie at det er samme pris om du skal overnatte eller ikkje. (Som regel er det sitteplassen i peisestova under lysbildeframsyninga som er flaskehalsen.) Middag på laurdag er inkludert, og vi har sjølvsagt gitt beskjed om at vi vil nytte badstua. Vi kjøper også inn til ein enkel fellesfrukost på søndagen. om du har spesielle påleggspreferansar så kan det vere lurt å ta med dette sjølv.
Påmeldinga er opna, og du finn den i appen Rubic Connect (logg inn med vipps og gå til påmeldingar) eller her: https://app.rubic.no/Public/Events/26221
Køyreplan:
Laurdag
12:00 -Hytta opnar
16:00 -18:00 -Førmiddagsbadstu
18:00 -Middag
19:00-19:30 -Oppvask
19:30 og utover - Framsyning av bilete i to bolkar, sosialt samrøre, røling, meir badstubading, svingstang.
Søndag
08:30 og utover -Enkel fellesfrukost
Før 12:00 -Nedvask og oppvask etter fordelte oppgåver.
12:00 -Utsjekk
Comentários